42歲港女下月「半退休」告別全職 自揭非有錢人也能退 「低物慾、敢捨棄」宣言點醒萬千社畜｜Juicy叮

本港一名即將踏入42歲的女網民在Threads上高調宣布「聖誕假期之後暫時就不會返全職了」，瞬間引爆熱議，更引出一大班隱世提早退休族現身，掀起一場關於中年脫離社畜行列的深度討論。

樓主剖白：工作近20年 厭倦日做十幾粒鐘

帖文在短短數日已累積逾十萬瀏覽量，發文的樓主在帖文中透露，自己於1984年平安夜出生，下個月便滿42歲。她笑言年輕時曾經發夢：「我以為我會35歲就un un 腳退休，點知都要搞到2027先開始脫離正職」。面對人生下半場，她坦言自己並非大富大貴：「我唔係無憂無慮等人養，只係慳住洗，人到中年，不想再過一日十幾小時工作的生活。」

帖文一出引起極大迴響，為了回應外界的好奇，樓主其後再補充自己的背景，她自言「只係一個好普通嘅人，喺香港有個專業，做咗差唔多20年，算係高收入，有啲資產。不過喺香港嚟講，一定唔係有錢人。」她之所以有勇氣退下火線，全因物慾不高：「只係我對生活唔係好高要求（本來出身就普通），所以唔想60歲先嚟過自己想過嘅生活。」

對於遲了七年才達成目標，有暖心網民幽默安慰：「減返covids嗰幾年就唔係推遲咗好多」，令樓主大呼感動：「你真係好人」。

同路人齊現身：原來香港咁多人已經「半退休」？

誰說香港人一定只識返工？這篇帖文意外成為「提早退休同溫層」的召集令，大批30至40多歲的網民紛紛現身說法，分享自己脫離全職後的爽快人生。

有網民表示自己已經「quit咗full time一年，唔想再日日過朝9晚5嘅生活，我唔係專業人士都做到，你更加冇問題，只要對生活唔好有太高追求就可以」。樓主對此深表認同，回覆指：「對，人生最可貴是選擇」，該網民亦補充：「每個選擇都有得有失，只要知道自己最想要咩就可以」。

另一批網民則選擇「微退休」或轉做兼職的彈性模式，有網民分享「我38就轉左做part time…一個月返20日到，無咩儲蓄，只係唔算大負擔！一樣重可以去下旅行！」亦有網民選擇「一年工作150日左右，一年有百幾日可以去十次左右旅行，窮遊」，樓主亦讚賞道：「最緊要係自己喜歡的生活」。更有年屆五十的過來人留言打氣：「我都喺前幾年冇再返全職，留返時間俾自己、家人，就快踏入50歲嘅我，應該餘生都唔會再返全職了。」

從留言可見，不少人的快樂都源於重奪時間的主導權，正如一位已半退休的網民所言：「之前半生人都係讀書課外活動考試讀書，返工升職再返工…沒有時間的自由。」

醒世金句頻出：困住你嘅唔係錢，係無限膨脹嘅慾望

除了滿滿的「恭喜」與「羨慕」，留言區亦出現不少堪稱「人間清醒」的精闢分析，直指香港人不敢停下來的心魔。有網民指出：「好佩服你清楚自己足夠嘅標準喺邊。好多人困喺職場唔係因為唔夠錢，而係欲望無限膨脹停唔到落嚟。42歲有返自己嘅時間掌控權，真心恭喜你！」

另一位網民亦留下一段極具啟發性的金句：「由每日十幾個鐘到可以自己揀節奏，最難嗰步從來唔係計數，而係肯承認舊有嘅生活方式已經唔啱自己。慳住洗換返嚟嘅自由，先至係真正嘅選擇權。」更有投資界網民笑言：「『慳住洗』先係真正嘅退休技能，我連慳字點寫都唔記得。」

不過，提早退休並非只是一味放假，有已經退休三年半的過來人溫馨提示，退休後「間中會多愁善感」，當樓主好奇反問「Oh why」時，對方耐心地分享研究指：「好多退休人士會經歷蜜月期、幻滅期、磨合期同適應期」，並建議樓主只要接受「退休後會有ups & downs」，慢慢調節便無問題。

此外，有網民亦分享自己面對長輩壓力的無奈，指自己41歲，「其實兩年前起已考慮過半退休，不過母親肯定不喜歡。雖然很難聽，但等母親不在後，就會即時退下火線了。每星期有5日時間不是真正屬於自己，實在太浪費人生了。」樓主則鬼馬地獻計：「你唔講，我唔講，佢點知？除非老母同老闆係同一個人」。

現實派拷問：喺香港唔返工，到底要有幾多身家？

當然，身處高消費的香港，講理想都要講現實，不少網民對樓主的「底氣」極度好奇，紛紛追問：「好奇一問你每月有幾錢被動收入先退到休」、「有冇500萬或以上？」甚至有網民推算：「冇700-800 萬現金都唔敢退啦嘛，識人炒股38歲都係呢個數唔再返工自己炒股補貼生活」。

面對同齡人的高歌離席，不少仍在職場苦戰的網民大嘆同人唔同命：「你好勁呀，同你同年我仲捱緊騾仔」、「我養自己一個都未見到岸邊」。有網民亦質疑在香港的環境下，工作二十多年便退休是否太離地：「起香港咁高消費環境+上你咁既年齡，除非中左六合彩先咁把炮」，更有網民抵死地留下一句反話：「祝你早日回歸full time」，甚至有人抓錯重點吐嘈：「上threads 真係每日刷新眼界…1984出世叫中年」。

值得一提的是，雖然有網民揣測樓主必定是單身無兒女才能如此瀟灑，但從樓主與一位身處芬蘭的兩孩媽媽的對話中，樓主透露「其實過咗五歲，都無咁困身，可能我個人又care free」，令其他網民驚嘆：「有細路都可以唔介意正職收入少左，犀利」。

來源：Threads

延伸閱讀：50歲港夫婦攜800萬北上退休！留低剛畢業阿女自生自滅？背後真相反惹網民羨慕求交換